బాహుబలం న్యూస్, హుజూరాబాద్ (అక్టోబర్ 12):
వ్యవసాయానికి అవసరమైన నిరంతర నాణ్యమైన విద్యుత్, పంటలకు సరిపడా సాగునీరు, ప్రజలకు తాగునీరు తక్షణమే అందించాలని డిమాండ్ చేస్తూ ఓసీ జేఏసీ రాష్ట్ర మహిళా అధ్యక్షురాలు పూసల ప్రభావతి రెడ్డి సోమవారం హుజూరాబాద్‌లో పలువురు నాయకులతో కలిసి అధికారులకు వినతిపత్రం అందజేశారు.
ఈ సందర్భంగా పూసల ప్రభావతి రెడ్డి మాట్లాడుతూ...
"ఎల్నినో ప్రభావం వల్ల వర్షాభావ పరిస్థితులు ఏర్పడే ప్రమాదం ఉందని వాతావరణ నిపుణులు ముందస్తుగా హెచ్చరించినప్పటికీ, ప్రభుత్వం తగిన చర్యలు చేపట్టడంలో పూర్తిగా విఫలమైంది. సరైన సమయంలో నీరు అందక పంటలు ఎండిపోయే దుస్థితి నెలకొంది. రైతులను ఆదుకునేందుకు కాలువలు, చెరువుల ద్వారా వెంటనే సాగునీటిని విడుదల చేయాలి. అలాగే గ్రామాల్లో ప్రజలకు తాగునీటి ఎద్దడి తలెత్తకుండా యుద్ధప్రాతిపదికన ఏర్పాట్లు చేయాలి" అని డిమాండ్ చేశారు. పంటలను కాపాడటంలో ప్రభుత్వం నిర్లక్ష్యం వహిస్తే రైతులతో కలిసి ఉద్యమిస్తామని హెచ్చరించారు.
ఈ కార్యక్రమంలో పలువురు జేఏసీ ప్రతినిధులు, స్థానిక నాయకులు పాల్గొన్నారు.