బాహు బలంన్యూస్ హైదరాబాద్, నవంబర్ 07:
ఎన్నికల సమయంలో ఇచ్చిన హామీలను తుంగలో తొక్కుతూ ఓసీ వర్గాల సంక్షేమాన్ని విస్మరించడం రేవంత్ రెడ్డి ప్రభుత్వానికి తగదని, తక్షణమే ఇచ్చిన హామీలను నెరవేర్చాలని ఓసీ జేఏసీ జాతీయ అధ్యక్షుడు పోలాడి రామారావు డిమాండ్ చేశారు. శనివారం హైదరాబాద్‌ మైత్రీవనంలోని కార్పొరేషన్ కార్యాలయంలో రాష్ట్ర వెల్మ సంక్షేమ కార్పొరేషన్ చైర్మన్‌గా జువ్వాడి నర్సింగరావు ప్రమాణ స్వీకారం చేసి, పదవీ బాధ్యతలు స్వీకరించారు. ఈ సందర్భంగా ఓసీ జేఏసీ జాతీయ అధ్యక్షుడు పోలాడి రామారావు ఆధ్వర్యంలో నాయకులు నూతన చైర్మన్‌కు శాలువాలు కప్పి ఘనంగా సన్మానించి శుభాకాంక్షలు తెలిపారు.
అనంతరం హకీంపేటలోని ఆల్ ఇండియా పద్మనాయక వెలమ అసోసియేషన్ కళ్యాణ మండపంలో ఏర్పాటు చేసిన ఆత్మీయ అభినందన సభ ఘనంగా జరిగింది. ఈ సమావేశంలో ముఖ్య అతిథులుగా కాంగ్రెస్ సీనియర్ నాయకులు, రాజ్యసభ మాజీ సభ్యులు డాక్టర్ కేవీపీ రామచంద్రరావు, రాష్ట్ర మంత్రి గడ్డం వివేక్ వెంకటస్వామి, పెద్దపల్లి ఎంపీ గడ్డం వంశీకృష్ణ, భువనగిరి ఎంపీ చామల కిరణ్ కుమార్ రెడ్డి, జగిత్యాల ఎమ్మెల్యే డాక్టర్ సంజయ్ కుమార్, రామగుండం ఎమ్మెల్యే మక్కాన్ సింగ్ ఠాకూర్ తదితరులు పాల్గొన్నారు. ఈ సందర్భంగా సీనియర్ నేత డాక్టర్ కేవీపీ రామచంద్రరావును ఓసీ జేఏసీ తరఫున పోలాడి రామారావు శాలువాతో ఘనంగా సత్కరించారు.

ఓసీ కార్పొరేషన్లకు చట్టబద్ధత కల్పించాలి: పోలాడి రామారావు...
ఈ సమావేశంలో పోలాడి రామారావు మాట్లాడుతూ.. గత అసెంబ్లీ ఎన్నికల ముందు టీపీసీసీ అధ్యక్షుడి హోదాలో రేవంత్ రెడ్డి ఓసీ సామాజిక వర్గాల పేదల అభ్యున్నతికి ప్రత్యేక నిధులు కేటాయిస్తామని, సంక్షేమ కార్పొరేషన్లు ఏర్పాటు చేస్తామని హామీ ఇచ్చారని గుర్తుచేశారు. ప్రభుత్వం ఏర్పడి మూడు సంవత్సరాలు గడుస్తున్నా ఆ హామీల అమలులో తీవ్ర అలసత్వం ప్రదర్శిస్తున్నారని ఆగ్రహం వ్యక్తం చేశారు. ప్రస్తుతం వెలమ, ఆర్యవైశ్య, కమ్మ కార్పొరేషన్లను కేవలం నామమాత్రంగా ప్రకటించి, ఎలాంటి నిధులు కేటాయించకుండా, పూర్తిస్థాయి పాలక మండళ్లు ఏర్పాటు చేయకుండా కాలయాపన చేస్తున్నారని మండిపడ్డారు. మరోవైపు రెడ్డి కార్పొరేషన్‌కు కనీసం చైర్మన్‌ను కూడా నియమించకపోవడం శోచనీయమన్నారు. తక్షణమే అన్ని ఓసీ కార్పొరేషన్లకు చట్టబద్ధతతో కూడిన పూర్తిస్థాయి పాలక మండళ్లను నియమించి, తగినన్ని బడ్జెట్ నిధులు కేటాయించాలని కోరారు. అలాగే ఈడబ్ల్యూఎస్ (EWS) విద్యార్థులకు కూడా విదేశీ విద్యా నిధి పథకాన్ని పూర్తిస్థాయిలో వర్తింపజేయాలని, నిరుద్యోగులు, రైతులు, సామాన్యులకు ఇచ్చిన హామీలను నెరవేర్చాలని విజ్ఞప్తి చేశారు.
ఈ కార్యక్రమంలో ఆల్ ఇండియా వెలమ అసోసియేషన్ అధ్యక్షుడు పాపారావు, ఉపాధ్యక్షుడు తాండ్ర శ్రీనివాసరావు, ఉమ్మడి వరంగల్ జిల్లా అధ్యక్షుడు, ఓసీ జేఏసీ రాష్ట్ర కోశాధికారి నడిపెల్లి వెంకటేశ్వరరావు, వరంగల్ జిల్లా ఓసీ జేఏసీ అధ్యక్షుడు కోలగూరి రాజేశ్వరరావు, ఉమ్మడి కరీంనగర్ జిల్లా వెలమ సంఘాల అధ్యక్షుడు నీలగిరి హనుమంతరావు, ప్రధాన కార్యదర్శి బల్మూరి ప్రసాదరావు, జిల్లా అధ్యక్షులు కమలాకర్‌రావు (సిరిసిల్ల), మనోహర్‌రావు (భూపాలపల్లి), ఐలినేని సాగర్‌రావు (జగిత్యాల), కిషన్‌రావు (మంచిర్యాల), వెంకటరమణారావు (ఆదిలాబాద్), ఓసీ జేఏసీ రాష్ట్ర నాయకుడు జనగామ కరుణాకర్‌రావులతో పాటు రాష్ట్ర నలుమూలల నుంచి వేలాదిగా తరలివచ్చిన వెలమ బంధువులు, వివిధ సామాజిక వర్గాల ప్రతినిధులు, ఓసీ జేఏసీ జిల్లా నాయకులు పాల్గొన్నారు.