బాహు బలంన్యూస్,కరీంనగర్, అక్టోబర్ 13;
కుల, మతాలతో సంబంధం లేకుండా ఆర్థిక ప్రాతిపదికన అన్ని వర్గాల పేదలకు విద్య, ఉద్యోగ, ఉపాధి రంగాల్లో సమన్యాయం కల్పించేందుకు కేంద్ర ప్రభుత్వం ప్రత్యేక చట్టం తీసుకురావాలని ఓసీ జేఏసీ జాతీయ, రాష్ట్ర అధ్యక్షులు పోలాడి రామారావు, రాష్ట్ర కో-ఆర్డినేటర్ గోపు జైపాల్ రెడ్డి డిమాండ్ చేశారు. ప్రస్తుతం అమలవుతున్న రిజర్వేషన్ విధానాల వల్ల అర్హులైన ఎందరో పేదలు అవకాశాలు కోల్పోతున్నారని, సమగ్ర ఆర్థిక స్థితిగతులే కొలమానంగా నూతన విధానాన్ని రూపొందించాలని వారు కోరారు.
మంగళవారం హైదరాబాద్‌లో ఏర్పాటు చేసిన విలేకరుల సమావేశంలో ఓసీ జేఏసీ నేతలతో పాటు ఆర్యవైశ్య మహాసభ రాష్ట్ర అధ్యక్షులు అమరవాది లక్ష్మీనారాయణ, ప్రధాన కార్యదర్శి దుబ్బా శ్రీనివాస్ తదితరులు పాల్గొన్నారు. ఈ సందర్భంగా పోలాడి రామారావు, గోపు జైపాల్ రెడ్డి మాట్లాడుతూ... తాము ఏ కులానికీ, వర్గానికీ వ్యతిరేకం కాదని స్పష్టం చేశారు. పేదరికం అనేది ఏ ఒక్క వర్గానికో పరిమితం కాదని, అన్ని కులాల్లోని నిరుపేద కుటుంబాలకు సమాన అవకాశాలు దక్కాలన్నదే తమ ఉద్యమ ప్రధాన లక్ష్యమని పేర్కొన్నారు.
ఈ సందర్భంగా వారు పలు కీలక డిమాండ్లను కేంద్ర ప్రభుత్వం దృష్టికి తెచ్చారు:
చట్టబద్ధ కమిషన్ ఏర్పాటు చేయాలి: దేశంలోని అన్ని సామాజిక వర్గాల వాస్తవ ఆర్థిక పరిస్థితులు, జీవన ప్రమాణాలపై సమగ్రంగా, శాస్త్రీయంగా అధ్యయనం చేసేందుకు కేంద్రం తక్షణమే అధికారిక చట్టబద్ధ కమిషన్‌ను నియమించాలి. కమిషన్ నివేదిక ఆధారంగా పార్లమెంటులో చర్చ జరిపి, అవసరమైతే రాజ్యాంగ సవరణ ద్వారా శాశ్వత చట్టం తేవాలి.
ఈడబ్ల్యూఎస్ (EWS) తరహాలో అందరికీ వర్తింపు: అగ్రవర్ణాల్లోని పేదల కోసం అమల్లోకి తెచ్చిన ఈడబ్ల్యూఎస్ రిజర్వేషన్ల తరహాలోనే, అన్ని వర్గాల్లోని నిరుపేదలకు ఆర్థిక ప్రాతిపదికన విద్య, ఉద్యోగాల్లో సమాన అవకాశాలు కల్పించాలి.
దేశవ్యాప్త రథయాత్రకు సంపూర్ణ మద్దతు: ఆర్థిక ఆధారిత రిజర్వేషన్ల సాధన కోసం సామాజిక ఉద్యమకారుడు ప్రవీణ్ అరోరా ఆధ్వర్యంలో ఢిల్లీలోని రాజ్‌ఘాట్ నుంచి చేపట్టిన దేశవ్యాప్త రథయాత్రకు ఓసీ జేఏసీ, బహుజన కుల సంఘాల తరఫున సంపూర్ణ మద్దతు ప్రకటిస్తున్నట్లు తెలిపారు. ఈ యాత్ర తెలంగాణలోకి ప్రవేశించిన సందర్భంగా నిర్వహించే భారీ బహిరంగ సభలను పార్టీలకతీతంగా ప్రజలు, వివిధ ప్రజా సంఘాలు విజయవంతం చేయాలని పిలుపునిచ్చారు.
ఈ కార్యక్రమంలో పలు కుల, ప్రజా సంఘాల ప్రతినిధులు, వివిధ రంగాల ప్రముఖులు పాల్గొన్నారు.