బాహు బలంన్యూస్ హుజూరాబాద్, అక్టోబర్ 24 :
నిస్వార్థంతో సమాజ శ్రేయస్సుకు పాటుపడుతున్న బాలవికాస స్వచ్ఛంద సేవా సంస్థ సేవలు అందరికీ ఆదర్శనీయమని ఓసీ జేఏసీ రాష్ట్ర అధ్యక్షురాలు పూసల ప్రభావతిరెడ్డి కొనియాడారు. శనివారం స్థానిక హుజూరాబాద్ క్లబ్‌లో సంస్థ ఆధ్వర్యంలో అనాథ వృద్ధులు, దివ్యాంగుల దినోత్సవాన్ని ఘనంగా నిర్వహించారు.
కార్యక్రమంలో ముఖ్య అతిథిగా పాల్గొన్న పూసల ప్రభావతిరెడ్డి మాట్లాడుతూ.. సంస్థ పరిధిలోని కేంద్రాల్లో ఆశ్రయం పొందుతున్న వేలాది మంది నిస్సహాయ వృద్ధులను ఆదుకుంటూ, వారి ఆకలి తీర్చేందుకు నిర్వాహకులు చేస్తున్న కృషి శ్లాఘనీయమన్నారు. స్థానిక 2వ వార్డు కౌన్సిలర్ సమ్రీన్‌ గఫార్‌ ఖాన్‌, విశ్రాంత ఉపాధ్యాయురాలు అనురాధ కూడా సంస్థ సేవా దృక్పథాన్ని ప్రశంసించారు. అనంతరం 40 మంది అనాథ వృద్ధులకు నిత్యావసర సరకులు, నూతన వస్త్రాలు, బియ్యం డబ్బాలను పంపిణీ చేశారు.
ఈ సందర్భంగా శ్రీ వాసవి అన్నపూర్ణ ట్రస్ట్, వాసవి క్లబ్ ప్రతినిధులు గరెపల్లి శ్రీనివాస్, శ్రీనివాస్‌లు అన్నదానం చేపట్టగా, రతన్ మీసేవ నిర్వాహకులు తువ్వాళ్లను పంపిణీ చేశారు. కల్యాణ మండపాన్ని ఉచితంగా సమకూర్చిన వర్ధినేని రవీందర్‌రావుతో పాటు సహకరించిన దాతలను నిర్వాహకులు అభినందించారు. కార్యక్రమంలో కో-ఆప్షన్ సభ్యులు గొట్టె జమదగ్ని, అశ్విన్, సమన్వయకర్త ఎండీ ఖాజాబీ, ప్రతినిధులు జ్యోతి, రియాజ్, రజిత, కల్యాణి, హైమావతి తదితరులు పాల్గొన్నారు.
