బాహు బలంన్యూస్ హుజూరాబాద్, :
ప్రస్తుత పరిస్థితుల్లో ప్రతి నీటి చుక్క ఎంతో విలువైనదని, నీటిని పొదుపు చేస్తూ భావితరాలకు భద్రత కల్పించాల్సిన బాధ్యత ప్రతి ఒక్కరిపై ఉందని హుజూరాబాద్ నియోజకవర్గ బీసీ జేఏసీ గౌరవ అధ్యక్షుడు చందుపట్ల జనార్దన్, అధ్యక్షుడు సందేల వెంకన్న పిలుపునిచ్చారు.
ఈ సందర్భంగా వారు మాట్లాడుతూ.. ఎల్‌నినో ప్రభావం వల్ల వర్షాలు ఆశించిన స్థాయిలో కురవక భూగర్భ జలాలు అడుగంటిపోతున్నాయని ఆందోళన వ్యక్తం చేశారు. రానున్న వేసవిలో తీవ్ర నీటి ఎద్దడి ఏర్పడే ప్రమాదం ఉందని నిపుణులు హెచ్చరిస్తున్న నేపథ్యంలో, ప్రజలంతా అప్రమత్తం కావాలన్నారు. నేడు నీటిని వృథా చేస్తే రేపు తీవ్ర ఇబ్బందులు పడాల్సి వస్తుందని తెలిపారు. అవసరమైనంత మేరకే నీటిని వినియోగిస్తూ, ఇంకుడు గుంతల ద్వారా వర్షపు నీటిని ఒడిసిపట్టాలని కోరారు.
మొక్కలు నాటి సంరక్షించాలి
“నీరు లేనిదే జీవం లేదు.. చెట్లు లేనిదే ప్రకృతికి రక్షణ లేదు” అనే విషయాన్ని ప్రతి ఒక్కరూ గుర్తించాలని నేతలు సూచించారు. విస్తారంగా వర్షాలు కురవాలంటే పెద్ద ఎత్తున మొక్కలు నాటడమే కాకుండా, వాటిని సంరక్షించే బాధ్యతను కూడా తీసుకోవాలన్నారు. ఈ రోజు మనం తీసుకునే చిన్నపాటి జాగ్రత్తలే రేపటి తరాలకు గొప్ప వరంగా మారతాయని చెప్పారు. నీటి పొదుపు, పర్యావరణ పరిరక్షణపై ప్రజలకు నిరంతరం అవగాహన కల్పించడంలో ప్రజాప్రతినిధులు, అధికారులు చొరవ చూపాలన్నారు.
ఈ కార్యక్రమంలో హుజూరాబాద్ మండల ఉప సర్పంచుల ఫోరం అధ్యక్షుడు వన్నాల శివాజీ, బీసీ జేఏసీ ప్రధాన కార్యదర్శి ఇప్పకాయల సాగర్ (ఈవీఎస్), ఉపాధ్యక్షులు మామునూరు ప్రవీణ్ కుమార్, కొలిపాక క్రాంతి కుమార్, నాయకులు గొర్రె చిరంజీవి, కె. ఆదామ్, కుడికాల ప్రభాకర్, పిట్ట శ్రీనివాస్, తూముల రాజు తదితరులు పాల్గొన్నారు.
