బాహు బలంన్యూస్ కరీంనగర్ అర్బన్, అక్టోబరు 2:
సత్యం, అహింసలనే వజ్రాయుధాలుగా మలచుకుని పరాయి పాలన నుంచి దేశానికి విముక్తి ప్రసాదించిన జాతిపిత మహాత్మా గాంధీ ఆశయ సాధనకు ప్రతి ఒక్కరూ పునరంకితం కావాలని ఓసీ జేఏసీ జాతీయ అధ్యక్షుడు పోలాడి రామారావు పిలుపునిచ్చారు. గాంధీ జయంతిని పురస్కరించుకుని శుక్రవారం కరీంనగర్ శివారులోని రాంపూర్ జాతీయ రహదారి చౌరస్తా వద్ద ఉన్న మహాత్ముని కాంస్య విగ్రహానికి సంఘం ప్రతినిధులతో కలిసి ఆయన పూలమాలలు వేసి ఘనంగా నివాళులర్పించారు.
ఈ సందర్భంగా పోలాడి రామారావు మాట్లాడుతూ.. పదవులు, అధికారాన్ని ఆశించకుండా కేవలం దేశ స్వాతంత్య్రం, ప్రజా శ్రేయస్సే ధ్యేయంగా తుదిశ్వాస వరకు పోరాడిన మహనీయుడు గాంధీజీ అని కొనియాడారు. ‘సాదాసీదా జీవనం.. ఉన్నత ఆలోచనలు’ అనే జీవన విధానాన్ని స్వయంగా ఆచరించి ప్రపంచానికే దిక్సూచిగా నిలిచారని ప్రశంసించారు. ఆయన చూపిన సత్యం, అహింస, సహనం, సామాజిక బాధ్యత వంటి మహోన్నత విలువలను నిత్య జీవితంలో అలవర్చుకోవడమే జాతిపితకు అర్పించే నిజమైన నివాళి అని స్పష్టం చేశారు.
ఆర్థిక ప్రాతిపదికన రిజర్వేషన్లు కల్పించాలి
సమాజంలోని అన్ని వర్గాల్లోని పేదలకు సమన్యాయం చేకూరాలంటే కుల, మతాల ప్రాతిపదికన కాకుండా కేవలం ఆర్థిక స్థితిగతుల ఆధారంగానే విద్య, ఉద్యోగ, ఉపాధి రంగాల్లో రిజర్వేషన్లు అమలు చేయాలని ఈ సందర్భంగా పోలాడి రామారావు గళమెత్తారు. ఈ సమున్నత లక్ష్య సాధన కోసం న్యూఢిల్లీలోని మహాత్ముని సమాధి రాజ్‌ఘాట్‌ వద్ద నివాళులర్పించి, దేశవ్యాప్త బస్సు యాత్ర చేపట్టిన సామాజిక ఉద్యమకారుడు ప్రవీణ్ అరోరా పోరాటానికి ఓసీ జేఏసీ సంపూర్ణ మద్దతు ప్రకటిస్తోందని తెలిపారు. ఈ బస్సు యాత్రలో తమ జాతీయ, రాష్ట్ర స్థాయి ప్రతినిధులు క్రియాశీలకంగా పాల్గొంటున్నారని ఆయన పేర్కొన్నారు.
ఈ కార్యక్రమంలో కరీంనగర్ వాసవీ క్లబ్ అధ్యక్షుడు చిట్టిమల్ల శ్రీనివాస్, నగర మాజీ కార్పొరేటర్లు కోడూరి రవీందర్‌ గౌడ్, పుట్ట నరేందర్, ప్రముఖ నాయకులు ముద్దసాని కృష్ణారెడ్డి, పైడి రవి, గంప అనంతం, గొర్ల సంతోష్, పోల్సాని దేవేందర్‌రావు తదితరులు పాల్గొన్నారు.
