బాహు బలంన్యూస్ హుజురాబాద్, అక్టోబర్ 22:
బడుగు, బలహీన వర్గాలు రాజ్యాధికారాన్ని చేపట్టినప్పుడే అమరులైన కొమురం భీం, పండుగ సాయన్నలకు నిజమైన నివాళి అర్పించినట్లవుతుందని బీసీ జేఏసీ గౌరవ అధ్యక్షులు చందుపట్ల జనార్ధన్, అధ్యక్షులు సందేల వెంకన్న స్పష్టం చేశారు. స్థానిక అంబేడ్కర్ కూడలి వద్ద బీసీ జేఏసీ ఆధ్వర్యంలో కొమురం భీం, పండుగ సాయన్న జయంతి ఉత్సవాలు ఘనంగా జరిగాయి. ఈ సందర్భంగా వారి చిత్రపటాలకు పూలమాలలు వేసి నివాళులర్పించారు.
అనంతరం బీసీ జేఏసీ ముఖ్య నేతలు చందుపట్ల జనార్ధన్, సందేల వెంకన్న మాట్లాడుతూ, ‘జల్, జమీన్, జంగల్’ నినాదంతో నిజాం నవాబు నిరంకుశ పాలనపై సాయుధ పోరాటం సాగించిన వీరుడు కొమురం భీం అని, నాటి అగ్రవర్ణాల అహంకార ఆధిపత్య ధోరణికి వ్యతిరేకంగా పోరాడిన ధీరుడు పండుగ సాయన్న అని కొనియాడారు. వారి త్యాగాలు, పోరాటాల చరిత్ర బడుగుల గుండెల్లో చిరస్థాయిగా నిలుస్తుందన్నారు.
ఆ మహనీయుల జీవితాలను ఆదర్శంగా తీసుకొని అగ్రవర్ణ ఆధిపత్య నిరంకుశ విధానాలపై బహుజనులు ఎల్లప్పుడూ పోరాడాలని పిలుపునిచ్చారు. ఇప్పటికైనా బలహీన వర్గాల ప్రజలంతా ఐక్యమై, “మేం బలహీనులం కాదు.. బలవంతులం” అనే నినాదాన్ని చేతల్లో నిరూపిస్తూ రాజ్యాధికార దిశగా ముందుకు కదలాలని వారు ఉద్ఘాటించారు.
ఈ కార్యక్రమంలో ఉపసర్పంచుల ఫోరం మండల అధ్యక్షులు వన్నాల శివాజీ, బీసీ జేఏసీ ప్రధాన కార్యదర్శులు ఇప్పకాయల సాగర్, ఆలేటి రవీందర్, ఉపాధ్యక్షులు మామునూరు ప్రవీణ్ కుమార్, కొలిపాక క్రాంతి కుమార్, ఆడెపు శ్రీనివాస్, పుల్లూరి కృష్ణమూర్తి, ఆల్ ఇండియా అంబేడ్కర్ సంఘం జిల్లా ప్రధాన కార్యదర్శి మాడుగుల ఓదెలు, ప్రజా సంఘాల నాయకులు రామ్ రాజేష్, తిప్పారపు భువనచందర్, మోలుగు రమేష్, ఇల్లందుల సమ్మయ్య, దాట్ల ప్రభాకర్, ఎండీ బాబా, పోతారం అశోక్, పోగు సమ్మయ్య తదితరులు పాల్గొన్నారు.
