బాహు బలంన్యూస్,మానకొండూర్ / వన్నారం (కరీంనగర్):
చెడుపై మంచి సాధించిన విజయానికి ప్రతీకగా జరుపుకునే విజయదశమి (దసరా) పర్వదిన వేడుకలు కరీంనగర్ జిల్లా మానకొండూర్ మండల పరిధిలోని వన్నారం గ్రామంలో గ్రామ పంచాయతీ ఆధ్వర్యంలో అత్యంత వైభవంగా, ప్రశాంత వాతావరణంలో ఘనంగా జరిగాయి. ఈ ఉత్సవాల్లో సీనియర్ సిటిజన్, ఓసీ ఐకాస జాతీయ అధ్యక్షుడు పోలాడి రామారావు ముఖ్య అతిథిగా పాల్గొని ప్రత్యేక పూజలు నిర్వహించారు.
డప్పు చప్పుళ్లతో శోభాయాత్ర:
పండుగ సందర్భంగా ముందుగా గ్రామ దేవతల కూడలి నుంచి డప్పు చప్పుళ్లు, మంగళవాయిద్యాల నడుమ గ్రామ భక్తాంజనేయ దేవాలయం మీదుగా శోభాయాత్ర ప్రారంభమైంది. దుర్గామాతకు నూతన వస్త్రాలు సమర్పించే గంగుల రవి నివాసం వరకు మహిళలు, యువకులు, గ్రామస్తులు పెద్ద సంఖ్యలో తరలివెళ్లి ఊరేగింపు నిర్వహించారు. అనంతరం తిరిగి గ్రామ దేవతల విగ్రహాల ప్రాంగణానికి చేరుకున్నారు.
సంప్రదాయ పూజలు – బలిదానం:
పూర్వీకుల నుంచి వస్తున్న ఆచార సంప్రదాయాల ప్రకారం గంగుల రవి చేతుల మీదుగా గ్రామ దేవతలకు నైవేద్యాలు, వాయినాలు సమర్పించారు. అనంతరం గ్రామ పెద్ద బాకారపు ఓదెలుకు శాలువాతో సత్కరించి, నూతన వస్త్రాలు కప్పి పూజలు జరిపించారు. ఈ క్రమంలో భారీ జనసందోహం మధ్య గ్రామ దేవతల సమక్షంలో గ్రామ వీఆర్ఏ మద్దెల స్వామి శాస్త్రోక్తంగా గొర్రె పొట్టేలును బలిదానం చేశారు.
జమ్మి పూజ – అలాయ్-బలాయ్:
అనంతరం గ్రామస్తులంతా శోభాయాత్రగా స్థానిక ప్రాథమిక పాఠశాల ఆవరణ వద్దకు చేరుకున్నారు. అక్కడ ప్రతిష్ఠించిన పవిత్ర జమ్మి చెట్టుకు పోలాడి రామారావు, బాకారపు రాములు, గంగుల రవి తదితరులు శాస్త్రోక్తంగా పూజా కార్యక్రమాలు నిర్వహించారు. అనంతరం గ్రామస్తులు జమ్మి ఆకులను (బంగారంగా భావించి) తెంపుకుని ఒకరికొకరు ఇచ్చిపుచ్చుకుంటూ పెద్దల ఆశీస్సులు తీసుకున్నారు. ఆత్మీయంగా కౌగిలించుకుని అలాయ్-బలాయ్ చేసుకుంటూ దసరా శుభాకాంక్షలు తెలుపుకున్నారు.
ధర్మ విజయానికి ప్రతీక దసరా: పోలాడి రామారావు
ఈ సందర్భంగా పోలాడి రామారావు మాట్లాడుతూ.. అధర్మం, అన్యాయం, చెడుపై.. ధర్మం, న్యాయం సాధించిన విజయానికి ప్రతీక విజయదశమి అని పేర్కొన్నారు. దుర్గామాత దివ్య ఆశీస్సులతో ప్రతి ఇంటా సుఖసంతోషాలు, ఆయురారోగ్యాలు, అష్టైశ్వర్యాలు వెల్లివిరియాలని ఆకాంక్షించారు. ప్రజలందరూ తమ జీవితాల్లో ప్రతి అడుగులోనూ విజయాలు సాధించాలని మనస్ఫూర్తిగా కోరుకుంటున్నట్లు ఆయన తెలిపారు.
ఈ వేడుకల్లో గ్రామ పెద్దలు, ప్రజాప్రతినిధులు, యువకులు, మహిళలు మరియు గ్రామ ప్రజలు పెద్ద సంఖ్యలో పాల్గొని ఉత్సవాలను విజయవంతం చేశారు.