బాహు బలంన్యూస్ హుజురాబాద్, అక్టోబర్ 18:
తెలంగాణ ఆత్మగౌరవానికి, విశిష్ట సాంస్కృతిక వైభవానికి ప్రతీకగా నిలిచే బతుకమ్మ

హుజురాబాద్ మండలంలోని ఆడపడుచులతో పాటు రాష్ట్ర ప్రజలంతా ఐక్యతతో, ఘనంగా జరుపుకోవాలని ఓసీ జేఏసీ రాష్ట్ర మహిళా అధ్యక్షురాలు పూసల ప్రభావతి రెడ్డి పిలుపునిచ్చారు. తొమ్మిది రోజుల పాటు సాగే ప్రకృతి ఆరాధనోత్సవం సద్దుల బతుకమ్మతో పతాక స్థాయికి చేరుకుందని, హుజురాబాద్ మండలమంతా తీరొక్క పూల వనంగా మారి శోభిల్లుతోందని ఆమె పేర్కొన్నారు.
​ఈ సందర్భంగా పూసల ప్రభావతి రెడ్డి మాట్లాడుతూ.. భాద్రపద అమావాస్య నాడు ఎంగిలిపూల బతుకమ్మతో ప్రారంభమైన పూల సంబరాలు.. అటుకుల బతుకమ్మ, నువ్వుల బతుకమ్మ, ముద్దుల బతుకమ్మలుగా సాగి, చివరి రోజైన సద్దుల బతుకమ్మతో అంబరాన్నంటుతాయని వివరించారు. గునుగు, తంగేడు, చామంతి, గులాబీ, బంతి, గుమ్మడి తదితర ప్రకృతి సిద్ధమైన పూలతో మహిళలు బతుకమ్మలను తీర్చిదిద్ది ఆరాధించడం మన సంస్కృతికే గర్వకారణమని ఆమె కొనియాడారు.
​సద్దుల బతుకమ్మ నాడు గౌరమ్మకు సమర్పించే నైవేద్యాలకు ప్రత్యేక ఆధ్యాత్మిక, సాంస్కృతిక ప్రాధాన్యత ఉందని పూసల ప్రభావతి రెడ్డి గుర్తుచేశారు. పెరుగన్నం, చింతపండు పులిహోర, నిమ్మకాయ, కొబ్బరి, నువ్వుల సద్దులతో పాటు మక్కలు, సజ్జలు, బియ్యప్పిండితో తయారుచేసిన మలిద ముద్దలు, అప్పాలను భక్తిశ్రద్ధలతో నివేదిస్తారని తెలిపారు. పూజల అనంతరం మహిళలంతా ఒకరికొకరు వాయనాలు ఇచ్చిపుచ్చుకుంటూ, పిండివంటలు పంచుకుంటూ బంధుత్వాలు, ఆత్మీయతలను మరింత దృఢపరుచుకుంటారని ఆమె వివరించారు.
​సాయంత్రం వేళల్లో ఆడపడుచులు సరికొత్త పట్టువస్త్రాలు ధరించి గ్రామాలలోని ఆలయాలు, ప్రధాన కూడళ్లు, మైదానాల వద్ద గౌరమ్మ చుట్టూ తిరుగుతూ “బతుకమ్మ బతుకమ్మ ఉయ్యాలో..” అంటూ లయబద్ధంగా చప్పట్లు కొడుతూ, కోలాటాలు ఆడే దృశ్యం కనులవిందు చేస్తుందని పేర్కొన్నారు. అనంతరం చెరువులు, జలాశయాల వద్దకు చేరి “పోయిరా బతుకమ్మ.. పోయిరావమ్మా.. మళ్లీ ఏటికి త్వరగా రావమ్మా” అంటూ భక్తి భావంతో వీడ్కోలు పలుకుతారని తెలిపారు. మండల ప్రజలు, తెలంగాణ మహిళా లోకం అంతా సుఖసంతోషాలు, ఆయురారోగ్యాలతో వర్ధిల్లాలని ఈ సందర్భంగా పూసల ప్రభావతి రెడ్డి ఆకాంక్షించారు.