బాహు బలం న్యూస్ కరీంనగర్ (ప్రత్యేక ప్రతినిధి): అసెంబ్లీ ఎన్నికల సమయంలో ఇచ్చిన మేనిఫెస్టో హామీలను కాంగ్రెస్ ప్రభుత్వం తుంగలో తొక్కిందని, ప్రజలకు ఇచ్చిన ప్రతి హామీని తక్షణమే నెరవేర్చాలని ఓసీ, రైతు ప్రజా సంఘాల జేఏసీ జాతీయ అధ్యక్షుడు పోలాడి రామారావు డిమాండ్ చేశారు. రాష్ట్రంలో కాంగ్రెస్ ప్రభుత్వం ఏర్పాటై 33 నెలలు పూర్తయిన సందర్భంగా సీఎం రేవంత్ రెడ్డి కరీంనగర్ పర్యటనకు వస్తున్న నేపథ్యంలో, ప్రజా సమస్యల పరిష్కారాన్ని కోరుతూ రాసిన బహిరంగ లేఖ ప్రతులను మంగళవారం కరీంనగర్‌లో పాత్రికేయులకు విడుదల చేశారు.
​ఈ సందర్భంగా ఆయన మాట్లాడుతూ పీసీసీ అధ్యక్షుడి హోదాలో నాడు ఇచ్చిన హామీలను అధికారంలోకి వచ్చాక విస్మరించడం తగదని మండిపడ్డారు. లేఖలో పేర్కొన్న పలు కీలక అంశాలు, డిమాండ్లు:

​విద్యారంగంపై నిర్లక్ష్యం వీడాలి – జీవో 97 రద్దు చేయాలి

​విద్యార్థులకు ఉపాధి, ఉద్యోగ అవకాశాల కల్పనలో, ఫీజు రీయింబర్స్‌మెంట్ బకాయిల విడుదలలో, స్కాలర్‌షిప్‌లు–స్టైఫండ్ల మంజూరులో ప్రభుత్వం తీవ్ర అలసత్వాన్ని ప్రదర్శిస్తోంది.
​ఎన్నికల మేనిఫెస్టోలో ప్రకటించిన నిరుద్యోగ భృతి ఊసే లేకుండా పోయింది.
​‘తెలంగాణ పబ్లిక్ స్కూల్స్’ పేరుతో రాష్ట్రవ్యాప్తంగా 105 ప్రభుత్వ పాఠశాలలను మూసివేయాలనే నిర్ణయం సరికాదు.
​ప్రభుత్వ పాలిటెక్నిక్ కళాశాలలను స్కిల్ యూనివర్సిటీలో విలీనం చేసే జీవో నెం. 97ను తక్షణమే రద్దు చేయాలి.

​అన్నదాతలను ఆదుకోండి – అన్ని రకాల ధాన్యానికి బోనస్ ఇవ్వాలి

​రైతులకు ఎకరానికి ఏటా రూ. 15,000 చొప్పున ఇస్తామన్న రైతుభరోసా నేటికీ అమలుకు నోచుకోలేదు.
​పంట రుణమాఫీ పథకంలో ఇంకా మిగిలిపోయిన అర్హులైన 30 శాతం మంది రైతులకు తక్షణమే రుణమాఫీ వర్తింపజేయాలి. రైతుబీమా అమలులో జాప్యాన్ని నివారించాలి.
​క్వింటాలుకు రూ. 500 బోనస్‌ను కేవలం సన్న రకాలకే పరిమితం చేయడం రైతాంగానికి తీరని ద్రోహం; అన్ని రకాల ధాన్యానికి బోనస్ చెల్లించాలి.
​కొనుగోలు కేంద్రాల్లో దళారుల ప్రమేయం లేకుండా ప్రభుత్వమే మద్దతు ధరతో సకాలంలో ధాన్యం సేకరించాలి.
​సబ్సిడీపై వ్యవసాయ పనిముట్లను అందించడంతో పాటు, కాళేశ్వరం ప్రాజెక్ట్ పిల్లర్లకు యుద్ధప్రాతిపదికన మరమ్మతులు చేపట్టి సాగునీరు అందించాలి. ఎస్సారెస్పీ (SRSP) ద్వారా నీటిని విడుదల చేసి చెరువులు, కుంటలను నింపాలి.

​కార్పొరేషన్లకు నిధులు కేటాయించాలి – ఈడబ్ల్యూఎస్ (EWS) కోటా పటిష్ట అమలు

​వివిధ ఓసీ వర్గాల పేదల సంక్షేమానికి ప్రత్యేక కార్పొరేషన్లను ఆర్భాటంగా ప్రకటించిన ప్రభుత్వం, వాటికి పూర్తిస్థాయి పాలక మండళ్లు ఏర్పాటు చేయకపోగా కనీస నిధులు కూడా కేటాయించలేదు. రెడ్డి కార్పొరేషన్‌కు ఇప్పటికీ పాలక మండలిని నియమించకపోవడం శోచనీయం.
​విదేశీ విద్య కోసం అందించే ఓవర్సీస్ స్కాలర్‌షిప్ పథకంలో ఈడబ్ల్యూఎస్ పేద విద్యార్థులకు అవకాశం కల్పించాలి.
​గురుకులాలు, రెసిడెన్షియల్ విద్యాసంస్థల్లో ఈడబ్ల్యూఎస్ రిజర్వేషన్లను పకడ్బందీగా అమలు చేయడంతో పాటు, ప్రతి జిల్లాకు ఒక ప్రత్యేక ఈడబ్ల్యూఎస్ రెసిడెన్షియల్ కళాశాలను ఏర్పాటు చేయాలి.
​ఈడబ్ల్యూఎస్ కోటాలో మిగిలిపోయిన బ్యాక్‌లాగ్ పోస్టులను వెంటనే సంబంధిత అభ్యర్థులతోనే భర్తీ చేయాలి. ఈ రిజర్వేషన్ల పర్యవేక్షణకు ప్రత్యేకంగా ఒక ఉన్నతాధికారి (IAS/IPS) నేతృత్వంలో విభాగాన్ని ఏర్పాటు చేయాలి.

​కరీంనగర్ అభివృద్ధిపై పాలకుల నిర్లక్ష్యం

​మానేరు నదికి ఇరువైపులా అర్ధాంతరంగా నిలిచిపోయిన రివర్ ఫ్రంట్ పనులను వేగవంతం చేసి కరీంనగర్ బ్రాండ్ ఇమేజ్‌ను కాపాడాలి.
​నగరానికే తలమానికమైన కేబుల్ బ్రిడ్జి పరిసరాలు అసాంఘిక కార్యకలాపాలకు అడ్డాగా మారాయి; బ్రిడ్జిపై కనీసం లైట్లు కూడా వెలగకపోవడం అధికారుల నిర్లక్ష్యానికి నిదర్శనం.
​ఎల్ఎండీ సమీపంలోని ఐటీ టవర్స్‌లో కంపెనీలు లేక భవనాలు బోసిపోతున్నా పాలకులు పట్టించుకోవడం లేదు; స్థానిక నిరుద్యోగ యువతకు న్యాయం చేయాలి.
​మున్సిపల్ కార్పొరేషన్‌లో విలీనమైన శివారు కాలనీల్లో మౌలిక వసతులు కల్పించాలి. ఉమ్మడి జిల్లావ్యాప్తంగా గుంతలమయంగా మారిన పంచాయతీరాజ్, ఆర్ అండ్ బీ రోడ్లకు తక్షణమే మరమ్మతులు చేపట్టాలి.

​ప్రజా సంక్షేమం – ఇతర ముఖ్య డిమాండ్లు

​రాష్ట్రంలో విచ్చలవిడిగా వెలిసిన అక్రమ మద్యం బెల్ట్ షాపులను రద్దు చేసి, బార్ అండ్ రెస్టారెంట్ల సంఖ్యను నియంత్రించాలి.
​చేనేత కార్మికులకు ఉపాధి కల్పిస్తూ వారి నుంచే బతుకమ్మ చీరలను సేకరించి మహిళలకు సకాలంలో పంపిణీ చేయాలి.
​ఇందిరమ్మ ఇళ్ల లబ్ధిదారుల ఎంపిక ప్రక్రియలో స్థానిక గ్రామ పంచాయతీ సర్పంచులకు తప్పనిసరిగా భాగస్వామ్యం కల్పించాలి.

​ఈ ప్రజా సమస్యలు, డిమాండ్లపై ప్రభుత్వం వెంటనే స్పందించి చర్యలు చేపట్టకపోతే ప్రజలతో కలిసి పెద్దఎత్తున ఉద్యమిస్తామని పోలాడి రామారావు హెచ్చరించారు.
​లేఖపై సంతకాలు చేసిన ప్రముఖులు:
ఈ బహిరంగ లేఖపై ఓసీ జేఏసీ జాతీయ చైర్మన్ నల్లా సంజీవరెడ్డి, జాతీయ సలహాదారు పెండ్యాల కేశవరెడ్డి, రాష్ట్ర అధ్యక్షుడు గోపు జైపాల్‌రెడ్డి, ప్రధాన కార్యదర్శి దుబ్బా శ్రీనివాస్, వర్కింగ్ ప్రెసిడెంట్ తాడిశెట్టి పశుపతి, ఉపాధ్యక్షులు చెన్నమనేని పురుషోత్తమరావు, చందుపట్ల నర్సింహారెడ్డి, పెండ్యాల రాంరెడ్డి, బుస్సా శ్రీనివాస్, కోశాధికారి నడిపెల్లి వెంకటేశ్వర్‌రావు, ప్రచార కార్యదర్శులు గూడూరు స్వామిరెడ్డి, కామిడి సతీష్‌రెడ్డి, కార్యదర్శి ఎడవెల్లి కొండాల్‌రెడ్డి, ఉమ్మడి జిల్లా నాయకులు ఉట్కూరి రాధాకృష్ణారెడ్డి, జున్నుతుల రాజిరెడ్డి, ఐలినేని మల్లికార్జున్‌రెడ్డి, బీరెడ్డి కరుణాకర్‌రెడ్డి, తాటిపల్లి రాజన్న, కంకణాల సరోజన, ప్రభావతి రెడ్డి, చీటీ శిరీష, ఏనుగు చొక్కారెడ్డి, ఎన్నం కిషన్‌రెడ్డి, డాక్టర్ దీపక్‌బాబు, కొత్తకొండ రవీందర్‌రావు, జనగామ కరుణాకర్‌రావు, నల్ల కొండాల్‌రెడ్డి, వంగళ తిరుపతిరెడ్డి, మహంకాళి రాజన్న, బండ సంపత్‌రెడ్డి, జంపాల నర్సయ్య, సుద్దాల రాజయ్య, చింతిరెడ్డి రమణారెడ్డి తదితరులు సంతకాలు చేశారు.