బాహు బలంన్యూస్ హనుమకొండ,:
ప్రముఖ ప్రజాకవి, రచయిత, తత్వవేత్త, అంతర్జాతీయ వరల్డ్ రికార్డు గ్రహీత డాక్టర్ నాగుల సత్యంగౌడ్కు జాతీయస్థాయి ప్రతిష్ఠాత్మక ‘విశ్వ కళావిభూషణ్’ పురస్కారం లభించింది. సాహిత్య రచనలు, సమాజ సేవ, ఆధ్యాత్మిక రంగాల్లో ఆయన అందిస్తున్న విశేష సేవలను గుర్తించి తెలుగు వెలుగు సాహితీ వేదిక, తెలుగు ఇండియన్ కల్చరల్ బుక్ ఆఫ్ రికార్డ్స్, శ్రీ విరాట్ విశ్వకర్మ విజ్ఞాన ఆధ్యాత్మిక ధార్మిక కళాపరిషత్ సంస్థలు సంయుక్తంగా ఈ అవార్డును ప్రకటించాయి.
హనుమకొండలోని జయకృష్ణ కాన్ఫరెన్స్ హాలులో ఆదివారం జరిగిన కార్యక్రమంలో సంస్థల వ్యవస్థాపకుడు పోలోజు రాజ్కుమార్ అధ్యక్షతన సత్యంగౌడ్ను అత్యంత ఘనంగా సత్కరించారు. ముఖ్య అతిథులుగా విచ్చేసిన ప్రముఖుల చేతుల మీదుగా ఆయనకు గురు కిరీటాన్ని ధరింపజేసి, మెడల్ వేసి, పట్టుశాలువాతో సత్కరించి ‘విశ్వ కళావిభూషణ్’ జ్ఞాపికను అందజేశారు.
ఈ సందర్భంగా వక్తలు మాట్లాడుతూ.. సత్యంగౌడ్ అపార ఆధ్యాత్మిక జ్ఞానంతో సమాజానికి మార్గదర్శనం చేస్తున్నారని, ఆయన రచనలు, సేవలు సమాజానికి ఎంతో విలువైనవని కొనియాడారు. అనంతరం సత్కార గ్రహీత సత్యంగౌడ్ ప్రసంగిస్తూ.. “మానవుడు స్వార్థాన్ని విడనాడి, ఆధ్యాత్మిక చింతనతో ప్రశాంత జీవనం సాగించాలి. సమాజానికి, దేశానికి యువతే మూలస్తంభాలు.. విద్యార్థులు చెడు వ్యసనాలకు దూరంగా ఉండి నవసమాజ నిర్మాణంలో భాగస్వాములు కావాలి” అని పిలుపునిచ్చారు.
ఈ కార్యక్రమంలో ముఖ్య అతిథులుగా ప్రపంచ రికార్డు గ్రహీత డాక్టర్ వంగల శాంతికృష్ణాచార్య, ప్రముఖ సినీ నటుడు ఆర్.ఎస్.నంద, నటి నుపుర్ ముఖర్జీ, ప్రముఖ న్యాయవాది ఎ.కిరణ్కుమార్, సామాజికవేత్తలు వనపర్తి పద్మజ, మల్లికార్జున్, గుంటుక రాధిక, పత్రిక సంపాదకుడు బిడ్డల ప్రశాంత్, ప్రతినిధులు వలబోజు మోహన్రావు, పాడిశెట్టి విష్ణువర్ధన్, అడ్డంకి నాగరాజు, అక్కనపల్లి యాదగిరిగౌడ్తో పాటు పలువురు కళాకారులు, కవులు, రచయితలు పాల్గొన్నారు.
