బాహు బలంన్యూస్ హైదరాబాద్, మే 20 :
హైదరాబాద్ మహానగరంలో రాష్ట్రస్థాయి ‘బేడ బుడగ జంగాల’ ఆత్మగౌరవ భవన నిర్మాణానికి 1500 గజాల ప్రభుత్వ స్థలాన్ని కేటాయించాలని బేడ బుడగ జంగం జన సంఘం రాష్ట్ర అధ్యక్షులు సిరిపాటి వేణు కోరారు. మంగళవారం నాడు ఆయన నేతృత్వంలోని సంఘం ప్రతినిధి బృందం రాష్ట్ర ఎస్సీ, ఎస్టీ సంక్షేమ శాఖ మంత్రివర్యులు అడ్లూరి లక్ష్మణ్ కుమార్ ను మర్యాదపూర్వకంగా కలిసి, సమాజం ఎదుర్కొంటున్న పలు సమస్యలపై సుదీర్ఘంగా చర్చించి, ఒక వినతిపత్రాన్ని సమర్పించింది.
వసతి లేక నిరుపేదల అవస్థలు
ఈ సందర్భంగా రాష్ట్ర అధ్యక్షులు సిరిపాటి వేణు మాట్లాడుతూ.. వివిధ రకాల వ్యక్తిగత, ప్రభుత్వ, ఉపాధి పనుల నిమిత్తం రాష్ట్రంలోని వివిధ జిల్లాల నుండి నిరుపేద బేడ బుడగ జంగం కులబాంధవులు ప్రతిరోజు హైదరాబాద్ నగరానికి వస్తుంటారని తెలిపారు. అయితే, నగరంలో వారికి సరైన వసతి సౌకర్యాలు లేకపోవడం వల్ల తీవ్ర ఇబ్బందులు ఎదుర్కొంటున్నారని మంత్రి దృష్టికి తీసుకెళ్లారు. రాత్రి సమయాల్లో బస చేయడానికి చోటు లేక రైల్వే స్టేషన్లు, బస్ స్టేషన్లు, ప్లాట్ఫారాలపైన పడుకుంటూ నానా అవస్థలు పడుతున్నారని ఆవేదన వ్యక్తం చేశారు.
ఆత్మగౌరవ భవన నిర్మాణం అత్యవసరం
సంచార జీవులైన తమ సామాజిక వర్గానికి రాజధాని నగరంలో ఒక శాశ్వత వసతి గృహం ఉండటం ఎంతో అవసరమని సిరిపాటి వేణు పేర్కొన్నారు. సమాజ శ్రేయస్సును, పేదల కష్టాలను దృష్టిలో ఉంచుకుని హైదరాబాదులో 1500 గజాల స్థలాన్ని కేటాయించి, ప్రభుత్వ ఖర్చుతోనే రాష్ట్రస్థాయి ‘బేడ బుడగ జంగాల ఆత్మగౌరవ భవనం’ నిర్మించి ఇవ్వాలని వారు మంత్రికి విజ్ఞప్తి చేశారు. ఈ భవనం అందుబాటులోకి వస్తే గ్రామీణ ప్రాంతాల నుండి వచ్చే విద్యార్థులకు, నిరుద్యోగులకు, రోగులకు ఎంతో ఆసరాగా ఉంటుందని వివరించారు.
మంత్రి సానుకూల స్పందన.. సంఘం కృతజ్ఞతలు
సంఘం ప్రతినిధులు సమర్పించిన వినతిపై ఎస్సీ, ఎస్టీ సంక్షేమ శాఖ మంత్రి అడ్లూరి లక్ష్మణ్ కుమార్ సానుకూలంగా స్పందించారు. బేడ బుడగ జంగాల సమస్యలను సావధానంగా విన్న మంత్రి.. ఈ సమస్యను ప్రభుత్వం దృష్టికి తీసుకెళ్లి, స్థల కేటాయింపు మరియు భవన నిర్మాణ విషయమై సాధ్యమైనంత త్వరగా తగిన చర్యలు తీసుకుంటామని హామీ ఇచ్చారు. తమ విజ్ఞప్తి పట్ల సానుకూలంగా స్పందించిన మంత్రి కి బేడ బుడగ జంగం జన సంఘం తరఫున ప్రతినిధులు ప్రత్యేక కృతజ్ఞతలు మరియు ధన్యవాదాలు తెలియజేశారు.
ఈ కార్యక్రమంలో హైదరాబాద్ జిల్లా అధ్యక్షులు దేవుని కుమార్, రాష్ట్ర యూత్ ప్రధాన కార్యదర్శి చింతల రాజ్ పులేందర్ మరియు సంఘానికి చెందిన పలువురు ముఖ్య నాయకులు, కార్యకర్తలు పెద్ద సంఖ్యలో పాల్గొన్నారు. భేటీ అనంతరం నాయకులు “జై బేడ బుడగ జంగం.. జై జై బేడ బుడగ జంగం” అంటూ నినాదాలు చేశారు.
