రావుల ప్రభాకర్ దంపతుల గొప్ప మనసు: మున్సిపల్ సిబ్బందికి విందు, నూతన వస్త్రాల పంపిణీ.

బాహు బలంన్యూస్ హుజురాబాద్, మే 25: హుజురాబాద్ పట్టణంలోని ప్రతాపవాడకు చెందిన ప్రముఖ నవజీవన్ సామిల్ వ్యాపారి రావుల ప్రభాకర్, శ్రీమతి దంపతులు తమ ఔదార్యాన్ని చాటుకున్నారు. తమ కుమారుడు రావుల నాగేంద్ర-తారల వివాహ రిసెప్షన్ సందర్భంగా, మున్సిపల్ సిబ్బంది పట్ల వారు చూపిన ఆదరణ అందరి ప్రశంసలు అందుకుంది.

ఘనంగా వివాహ రిసెప్షన్, అపూర్వ ఆతిథ్యం
హుజురాబాద్‌లోని వెంకటసాయి గార్డెన్స్‌లో ఆదివారం రావుల నాగేంద్ర, తారల వివాహ రిసెప్షన్ అంగరంగ వైభవంగా జరిగింది. ఈ శుభకార్యాన్ని పురస్కరించుకుని, ప్రభాకర్ దంపతులు తమ గొప్ప మనసును చాటుకున్నారు. పట్టణ పరిశుభ్రతకు నిరంతరం కృషి చేసే మున్సిపల్ పారిశుద్ధ్య, కాంట్రాక్ట్, అవుట్‌సోర్సింగ్ కార్మికులు సుమారు 150 మందికి పైగా వారి కుటుంబాలతో సహా ఆహ్వానించి,వారికి పెళ్లి విందు భోజనం ఏర్పాటు చేశారు.

నూతన వస్త్రాలతో సత్కారం..

విందు భోజనంతో పాటు,ప్రభాకర్ దంపతులు మున్సిపల్ సిబ్బందికి నూతన వస్త్రాలను కూడా అందజేశారు. మహిళలకు చీరలు, జాకెట్ పీసులు, పురుషులకు ప్యాంటు, షర్టు పీసులను బహూకరించారు. వివాహానికి హాజరైన బంధుమిత్రులు, హుజురాబాద్ పట్టణానికి చెందిన మాజీ ప్రజా ప్రతినిధులు, వివిధ పార్టీల నాయకులు అతిథుల చేతుల మీదుగా ఈ వస్త్రాలను పంపిణీ చేయించారు. సుమారు రూ. 75,000 పైగా విలువైన ఈ వస్త్రాల పంపిణీ ప్రభాకర్ దంపతుల విశాల హృదయాన్ని మరోసారి రుజువు చేసింది.
సామాన్య ప్రజలకు కూడా భారీ విందు
మున్సిపల్ సిబ్బందికి ఆతిథ్యం ఇవ్వడంతో పాటు, ప్రభాకర్ దంపతులు తమ కుమారుడి వివాహ సందర్భంగా హుజురాబాద్ పట్టణంలోని కుమ్మరివాడ, ప్రతాపవాడ, ఫకీర్‌వాడ, శివాజీ నగర్, హనుమాన్ టెంపుల్ ఏరియా, వరంగల్ రోడ్ ఏరియా, విద్యానగర్ తదితర ప్రాంతాలకు చెందిన సుమారు రెండు వేలకు పైగా ప్రజలను ఆహ్వానించి వారికి కూడా ఘనంగా విందు భోజనం ఏర్పాటు చేశారు. నేటి తరుణంలో వివాహ విందుకు ఆహ్వానించడమే భారంగా భావించే పరిస్థితుల్లో, ప్రభాకర్ దంపతులు చూపిన ఈ ఆదరణ పలువురి ప్రశంసలు అందుకుంది.

కృతజ్ఞతలు, అభినందనలు.

ప్రభాకర్ దంపతుల ఔదార్యానికి మున్సిపల్ సిబ్బంది కృతజ్ఞతలు తెలిపారు. ఈ సందర్భంగా పలువురు ప్రజా ప్రతినిధులు, రాజకీయ నాయకులు ప్రభాకర్ దంపతులను అభినందించారు. వారి ఈ మంచి పని సమాజంలో ఇతరులకు ఆదర్శంగా నిలుస్తుందని పేర్కొన్నారు.