బాహు బలంన్యూస్,మెట్‌పల్లి (జగిత్యాల జిల్లా), ఆగస్టు 06 :పట్టా దార్ పాస్‌బుక్‌లో పేరు సవరణకు సంబంధించి విచారణ నివేదికను ఉన్నతాధికారులకు పంపేందుకు రూ. 5,000 లంచం డిమాండ్ చేసిన గ్రామ పాలన అధికారి (జి.పి.ఓ) ఏసీబీ అధికారులకు చిక్కారు.
జగిత్యాల జిల్లా మెట్‌పల్లి మండలం ఆత్మకూర్ గ్రామానికి చెందిన గ్రామ పాలన అధికారి మాథె రాజేష్ (37) బాధితుడి నుంచి రూ. 5,000 లంచం తీసుకుంటుండగా కరీంనగర్ ఏసీబీ అధికారులు గురువారం (06-08-2026) ఆత్మకూర్ జి.పి.ఓ కార్యాలయంలో రెడ్ హ్యాండెడ్‌గా పట్టుకున్నారు. నిందితుడి వద్ద నుంచి లంచం సొమ్మును స్వాధీనం చేసుకున్న అధికారులు, అతడిని అదుపులోకి తీసుకున్నారు. కేసు నమోదు చేసి కరీంనగర్‌లోని ప్రత్యేక ఏసీబీ కోర్టు న్యాయమూర్తి ముందు హాజరుపరచనున్నట్లు అధికారులు తెలిపారు.
పబ్లిక్ సర్వెంట్లు ఎవరైనా లంచం అడిగితే టోల్ ఫ్రీ నంబర్ 1064 లేదా వాట్సాప్ (9440446106) ద్వారా ఏసీబీకి ఫిర్యాదు చేయవచ్చని, ఫిర్యాదుదారుల వివరాలు రహస్యంగా ఉంచుతామని అధికారులు సూచించారు.