బాహు బలంన్యూస్ కరీంనగర్/హైదరాబాద్: జూన్ 06;
రాష్ట్రంలోని రైతులకు పాలకులు ఇచ్చిన హామీల అమలులో నిర్లక్ష్యాన్ని ప్రశ్నిస్తూ, తక్షణమే డిమాండ్లను సాధించుకునేందుకు రైతు ప్రజా సంఘాల జాయింట్ యాక్షన్ కమిటీ (జేఏసీ) ఆధ్వర్యంలో తలపెట్టిన ‘రైతుల మహాగర్జన సమరభేరి’ బహిరంగ సభకు కరీంనగర్ నగరం ముస్తాబైంది. జూన్ 14న సాయంత్రం 4 గంటలకు కరీంనగర్లోని ఎస్.ఆర్.ఆర్. ప్రభుత్వ డిగ్రీ కళాశాల మైదానంలో నిర్వహించనున్న ఈ భారీ సభకు సంబంధించిన ఏర్పాట్లు పూర్తయ్యాయని జేఏసీ అగ్రనేతలు వెల్లడించారు. శనివారం హైదరాబాద్లో నిర్వహించిన రాష్ట్ర, జిల్లాల ఐకాస ప్రతినిధుల సమన్వయ సమావేశంలో సభ ఏర్పాట్లపై సుదీర్ఘంగా చర్చించారు. ఈ సందర్భంగా ఐకాస జాతీయ అధ్యక్షుడు పోలాడి రామారావు, నేతలు గోపు జైపాల్ రెడ్డి, మహంకాళి రాజన్న, వణ్యాల భూపతి రెడ్డి, రాయపాటి వెంకటేశ్వర్ రావు తదితరులు మాట్లాడారు. రాష్ట్ర ప్రభుత్వం రైతాంగానికి ఇచ్చిన వాగ్దానాలను నిలబెట్టుకోవడంలో పూర్తిగా విఫలమైందని, ఈ సభ ద్వారా పాలకుల వైఫల్యాలను ఎండగడతామని వారు స్పష్టం చేశారు.
లక్షలాదిగా తరలిరానున్న రైతాంగం
ఈ మహాగర్జన సభకు రాష్ట్రవ్యాప్తంగా అన్ని జిల్లాల నుంచి రైతులు స్వచ్ఛందంగా తరలివస్తున్నట్లు నేతలు తెలిపారు. దాదాపు 2,500 బస్సులు, భారీ సంఖ్యలో ప్రైవేటు వాహనాలు, ట్రాక్టర్ల ద్వారా వివిధ మార్గాల్లో రైతులు సభాస్థలికి చేరుకోనున్నారు. సభకు అంచనాలకు మించి సుమారు రెండు లక్షల మందికి పైగా హాజరయ్యే అవకాశం ఉందని భావిస్తున్నారు. ఈ నేపథ్యంలో సభకు తరలివచ్చే రైతులకు సంఘీభావంగా 5 వేల మంది మహిళలతో కోలాటాల బృందాలు, 2 వేల మంది డప్పు కళాకారుల ప్రదర్శనలతో కరీంనగర్ వీధుల్లో భారీ ప్రదర్శన (ర్యాలీ) నిర్వహించనున్నారు.
భారీ ఏర్పాట్లు.. దాతల సహకారం
సభా ప్రాంగణమైన 10 ఎకరాల మైదానంలో ఎలాంటి తొందరపాటు జరగకుండా ఇరువైపులా పటిష్టమైన బారికేడ్లను నిర్మించారు. సుమారు 25 వేల కుర్చీలు, అత్యాధునిక లౌడ్ స్పీకర్లు, సభను అందరికీ స్పష్టంగా వీక్షించేందుకు వీలుగా భారీ ఎల్ఈడీ (LED) తెరలను ఏర్పాటు చేశారు. ఈ ఏర్పాట్లకు జిల్లాకు చెందిన ప్రస్తుత, మాజీ ప్రజాప్రతినిధులు ఎంతో సహకరించారని జేఏసీ నేతలు కొనియాడారు. సభకు వచ్చే రైతులకు ఎండ తీవ్రత దృష్ట్యా లక్ష మజ్జిగ ప్యాకెట్లు, 60 వేల పులిహోర పొట్లాలు, 60 వేల మినరల్ వాటర్ బాటిళ్లను వివిధ డైరీ యాజమాన్యాలు, దాతలు స్వచ్ఛందంగా సమకూర్చారు. ఈ సందర్భంగా దాతలందరికీ పోలాడి రామారావు ప్రత్యేక కృతజ్ఞతలు తెలిపారు.
సాంస్కృతిక ప్రదర్శనలు.. తోరణాల అలంకరణ
సభా వేదికకు ఎడమ వైపున తెలంగాణ ఉద్యమ ప్రముఖ గాయకుడు సందీప్ నేతృత్వంలో 100 మంది కళాకారుల బృందంతో ప్రత్యేక సాంస్కృతిక కార్యక్రమాలను ఏర్పాటు చేశారు. తెలంగాణ రైతాంగ పోరాటాల స్ఫూర్తిని రగిలించేలా ఈ ప్రదర్శనలు సాగనున్నాయి. సభ ప్రాముఖ్యతను చాటేలా కరీంనగర్ నగరానికి వచ్చే అన్ని ప్రధాన రహదారుల వెంబడి దాదాపు 20 కిలోమీటర్ల మేర స్వాగత తోరణాలు, భారీ అర్చీలను ఏర్పాటు చేసి నగరాన్ని సర్వాంగ సుందరంగా అలంకరించారు.
వివిధ రూట్లలో ఉచిత భోజన, విశ్రాంతి కేంద్రాలు
వివిధ జిల్లాల నుంచి వచ్చే రైతుల సౌకర్యార్థం ప్రధాన రహదారుల వెంబడి వాలంటీర్లతో కూడిన ఉచిత భోజన, మజ్జిగ, మంచినీటి వసతి మరియు విశ్రాంతి కేంద్రాలను ఏర్పాటు చేశారు:
వరంగల్ రూట్: కిట్స్ (KITS) సింగాపూర్ వద్ద
సిరిసిల్ల, కామారెడ్డి రూట్: కొదురుపాక వద్ద
ఆసిఫాబాద్, నిర్మల్, ఆదిలాబాద్ రూట్: ధర్మారం వద్ద
జగిత్యాల రూట్: గంగాధర క్రాస్ రోడ్ వద్ద
మంచిర్యాల, గోదావరిఖని, పెద్దపల్లి రూట్: సుల్తానాబాద్ వద్ద
సిద్దిపేట రూట్: శనిగరం వద్ద
హుస్నాబాద్ రూట్: ఎల్కతుర్తి వద్ద
ఈ కేంద్రాల నిర్వహణతో పాటు సభా ప్రాంగణంలో శాంతిభద్రతలు, క్రమశిక్షణను పర్యవేక్షించేందుకు 800 మందితో కూడిన ప్రత్యేక వాలంటీర్ల బృందాన్ని రంగంలోకి దించారు. మైదానం క్రిక్కిరిసిపోయే అవకాశం ఉన్నందున, నగరంలోని మరో ఆరు ప్రధాన కూడళ్లలో దాతల సహకారంతో పెద్ద ఎల్ఈడీ తెరలను ఏర్పాటు చేసి ప్రత్యక్ష ప్రసారం చేయనున్నారు.
పార్టీలకతీతంగా ప్రముఖుల హాజరు
రైతు సమస్యలపై జరుగుతున్న ఈ సమరభేరికి రాజకీయాలకతీతంగా అన్ని పార్టీల, ప్రజా సంఘాల నాయకులను ఆహ్వానించినట్లు నిర్వాహకులు తెలిపారు. ఈ సభకు ముఖ్య అతిథులుగా:
తన్నీరు హరీష్ రావు, ఈటల రాజేందర్, కల్వకుంట్ల కవిత, చాడ వెంకట్ రెడ్డి, జాన్ వెస్లీ, చలపతి రావు, ఆర్. కృష్ణయ్య, మందకృష్ణ మాదిగ, పోల్సాని సుగుణాకర్ రావు, రవీందర్ సింగ్, పెండ్యాల కేశవ రెడ్డి, ప్రొఫెసర్ కోదండరాం, అరుణోదయ విమలక్క, సంధ్య, అమరవాది లక్ష్మీనారాయణ, అజ్మీరా నాయక్ తదితర ప్రముఖులు హాజరుకానున్నారు.
ఈ మహాసభను జయప్రదం చేసేందుకు రైతులు, కౌలు రైతులు, వ్యవసాయ కార్మికులు మరియు ప్రజా సంఘాల ప్రతినిధులు పార్టీలకతీతంగా, పెద్ద ఎత్తున తరలివచ్చి విజయవంతం చేయాలని ఐకాస జాతీయ అధ్యక్షుడు పోలాడి రామారావు, రాష్ట్ర ఉమ్మడి జిల్లాల నాయకులు పిలుపునిచ్చారు.
