బాహు బలంన్యూస్ హుజురాబాద్, ఏప్రిల్ 28:
హుజురాబాద్ మున్సిపాలిటీ కో-ఆప్షన్ సభ్యుల ఎన్నిక ప్రక్రియ ముగిసింది. ఈ ఎన్నికల్లో కో-ఆప్షన్ సభ్యులుగా గొట్టే జమదగ్ని, ఆలేటి సుశీల, మహమ్మద్ అబ్దుల్ అలీం, మరియు ఫరీదా బేగం ఎన్నికయ్యారు. కాంగ్రెస్ పార్టీకి అంకితభావంతో పనిచేస్తున్న నాయకులకు ఈ పదవుల్లో ప్రాధాన్యత లభించడం విశేషం.
సేవకు దక్కిన ప్రతిఫలం..
నియోజకవర్గ ఇన్చార్జ్ వోడితల ప్రణవ్ అండదండలతో, కాంగ్రెస్ నాయకులు మొహమ్మద్ అష్ఫాక్ ఆశు తల్లి ఫరీదా బేగంకు ఈ అవకాశం దక్కింది. పార్టీ కష్టకాలంలో ఉన్నప్పటి నుండి అష్ఫాక్ ఆశు కుటుంబం అందిస్తున్న సేవలను గుర్తించిన ప్రణవ్, వారిని ఈ పదవికి ఎంపిక చేయడంలో కీలక పాత్ర పోషించారు.
ప్రణవ్ బాబు విజయం సాధించి ఉంటే ఇంకా పెద్ద పదవి దక్కేది: అష్ఫాక్ ఆశు..
ఈ సందర్భంగా మొహమ్మద్ అష్ఫాక్ ఆశు మాట్లాడుతూ స్వల్ప భావోద్వేగానికి లోనయ్యారు. “గత శాసనసభ ఎన్నికల్లో వోడితల ప్రణవ్ బాబు విజయం కోసం రాత్రింబవళ్లు కష్టపడ్డాం. ఆయన విజయం సాధించకపోవడం మాకు ఇప్పటికీ తీరని వేదన మిగిల్చింది. ఒకవేళ ప్రణవ్ బాబు గెలిచి ఉంటే, మా నిబద్ధతను గుర్తించి ఇంతకన్నా పెద్ద పదవినే కట్టబెట్టేవారు. పదవుల కన్నా ఆయనపై ఉన్న అభిమానమే మాకు ముఖ్యం. ఆయన విజయం సాధించకపోయినా, ఒక సామాన్య కార్యకర్తను గుండెల్లో పెట్టుకుని నా తల్లికి ఈ గౌరవాన్ని కల్పించిన ప్రణవ్ గారికి జీవితాంతం రుణపడి ఉంటాం” అని పేర్కొన్నారు.
అభివృద్ధిలో భాగస్వాములవుతాం..
మున్సిపల్ కో-ఆప్షన్ సభ్యురాలిగా తన తల్లి ఎన్నిక కావడం పట్ల అష్ఫాక్ ఆశు హర్షం వ్యక్తం చేస్తూ, పట్టణంలోని ముస్లిం మైనారిటీల సమస్యల పరిష్కారానికి మరియు మున్సిపల్ పరిధిలో అభివృద్ధి పనుల పర్యవేక్షణకు తమ వంతు కృషి చేస్తామని తెలిపారు. కొత్తగా ఎన్నికైన సభ్యులను పలువురు కాంగ్రెస్ నాయకులు, కార్యకర్తలు పూలమాలలతో సత్కరించి శుభాకాంక్షలు తెలియజేశారు.
