బాహు బలంన్యూస్ కరీంనగర్, ఏప్రిల్ 27 (ఈనాడు ప్రతినిధి):
రాష్ట్రంలోని అన్నదాతల న్యాయమైన డిమాండ్ల సాధనే లక్ష్యంగా కరీంనగర్ వేదికగా ‘రైతు మహా గర్జన’కు రంగం సిద్ధమైంది. రైతు ప్రజా సంఘాల ఐక్య కార్యాచరణ కమిటీ (JAC) ఆధ్వర్యంలో వచ్చే నెల 30వ తేదీ (శనివారం) సాయంత్రం 4 గంటలకు స్థానిక ఎస్.ఆర్.ఆర్ (SRR) ప్రభుత్వ కళాశాల మైదానంలో ఈ భారీ బహిరంగ సభను నిర్వహించనున్నారు. పంట పెట్టుబడి నుంచి పండించిన ధాన్యం విక్రయం వరకు రైతాంగం ఎదుర్కొంటున్న సమస్యలపై గళమెత్తేందుకు ‘చలో కరీంనగర్’ పేరుతో ఈ సమర భేరిని జేఏసీ నిర్వహిస్తోంది.
ప్రభుత్వ హామీల అమలుపై ఒత్తిడి
రాష్ట్ర ప్రభుత్వం రైతులకు ఇచ్చిన హామీలను తక్షణమే నెరవేర్చాలని జేఏసీ నాయకులు డిమాండ్ చేస్తున్నారు. ప్రధానంగా పెండింగ్లో ఉన్న రూ. 2 లక్షల రుణమాఫీని పూర్తిస్థాయిలో అమలు చేయాలని, రైతు భరోసా నిధులను విడతల వారీగా కాకుండా పంట సాగు సమయానికి ముందే ఒకేసారి విడుదల చేయాలని వారు కోరుతున్నారు. గతంలో ప్రకటించిన విధంగా అన్ని రకాల పంటలకు క్వింటాలుకు రూ. 500 బోనస్ చెల్లించడంతో పాటు, ధాన్యం కొనుగోలు చేసిన వెంటనే రైతుల ఖాతాల్లో నగదు జమ చేయాలని డిమాండ్ చేస్తున్నారు. వ్యవసాయ రంగాన్ని పరిశ్రమగా గుర్తించి, యంత్ర పరికరాలపై రాయితీలు కల్పించాలని ఈ సందర్భంగా వారు స్పష్టం చేశారు.
సామాజిక భద్రతకు పెద్దపీట
కేవలం సాగు సమస్యలే కాకుండా రైతు కుటుంబాల సామాజిక, ఆర్థిక భద్రత కోసం జేఏసీ పలు కీలక డిమాండ్లను తెరపైకి తెచ్చింది. 50 ఏళ్లు నిండిన రైతులకు నెలకు రూ. 6,000 పెన్షన్ అందించాలని, రైతు భీమా వయోపరిమితిని 70 ఏళ్లకు పెంచాలని కోరుతున్నారు. రైతు కుటుంబాల ఆరోగ్యం కోసం రూ. 20 లక్షల వరకు ఉచిత వైద్య సదుపాయం కల్పించేలా హెల్త్ కార్డులు జారీ చేయాలని, విద్యార్థులకు ఫీజు రీయింబర్స్మెంట్ నిధులను తక్షణమే విడుదల చేయాలని డిమాండ్ జాబితాలో చేర్చారు. స్వామినాథన్ కమిషన్ సిఫార్సుల మేరకు పంటల బీమా పథకాన్ని పకడ్బందీగా అమలు చేయాలని జేఏసీ నాయకత్వం విజ్ఞప్తి చేస్తోంది.
రైతాంగం కదలాలి..
రాష్ట్రవ్యాప్తంగా ఉన్న రైతాంగం రాజకీయాలకు అతీతంగా ఈ మహా గర్జనలో పాల్గొని విజయవంతం చేయాలని ఐక్య కార్యాచరణ కమిటీ పిలుపునిచ్చింది. ప్రకృతి వైపరీత్యాల వల్ల నష్టపోయిన రైతులను ఆదుకోవాలని, ఉపాధి హామీ పథకాన్ని వ్యవసాయానికి అనుసంధానం చేయాలని డిమాండ్ చేస్తూ లక్షలాది మందితో ఈ సభను నిర్వహించేందుకు సన్నద్ధమవుతున్నారు. ఈ మేరకు వివిధ జిల్లాల్లో సన్నాహక సమావేశాలు నిర్వహిస్తూ, కరపత్రాల ద్వారా అన్నదాతలను చైతన్యపరుస్తున్నారు.
