బాహు బలం న్యూస్ వీణవంక, మే 23:
ఆరుగాలం శ్రమించి, చెమటోడ్చి పండించిన ధాన్యాన్ని అమ్ముకోవడానికి అన్నదాతలు రోజుల తరబడి రోడ్లపైనే పడిగాపులు కాయాల్సిన దుస్థితి రావడం అత్యంత బాధాకరమని రైతు ప్రజా సంఘాల ఐకాస (జేఏసీ) జాతీయ అధ్యక్షుడు పోలాడి రామారావు తీవ్ర ఆవేదన వ్యక్తం చేశారు. ప్రభుత్వ కొనుగోలు కేంద్రాలలో నెల రోజులకు పైగా ధాన్యపు రాశులు పేరుకుపోయి, ఒకపక్క అకాల వర్షాలు, మరోపక్క తీవ్రమైన ఎండల కారణంగా రైతులు వడదెబ్బకు గురవుతున్నారని, ఇది రాష్ట్రంలో రైతన్నల దయనీయ స్థితికి అద్దం పడుతోందని మండిపడ్డారు.
శనివారం హుజురాబాద్ నియోజకవర్గం వీణవంక మండలంలోని బేతిగల్, కిష్టంపేట, మల్లారెడ్డిపల్లి, కోర్కల్, ఎలబాక, గంగారం, చల్లూర్, మామిడాలపల్లి తదితర గ్రామాల్లోని ధాన్యపు కొనుగోలు కేంద్రాలను రైతు ప్రజా సంఘాల నాయకులతో కలిసి ఆయన సందర్శించారు. క్షేత్రస్థాయిలో రైతులు ఎదుర్కొంటున్న ఇబ్బందులను, కొనుగోళ్లలో జరుగుతున్న ఆలస్యాన్ని అడిగి తెలుసుకున్నారు. అనంతరం మామిడాలపల్లి గ్రామంలో ఏర్పాటు చేసిన విలేకరుల సమావేశంలో ఆయన మాట్లాడారు.
కేంద్రంపై నెపం నెట్టడం బాధ్యతారాహిత్యం
రాష్ట్ర ప్రభుత్వమే నేరుగా ధాన్యం కొనుగోళ్లు చేపట్టాల్సి ఉండగా, తన విధిని విస్మరించి, నిర్లక్ష్య వైఖరితో ఆ నెపాన్ని కేంద్ర ప్రభుత్వంపై నెట్టడం పాలకుల బాధ్యతారాహిత్యానికి నిదర్శనమని పోలాడి రామారావు విమర్శించారు. కొనుగోలు కేంద్రాల్లో కనీస వసతులు కల్పించడంలోనూ, సకాలంలో కాంటాలు పెట్టడంలోనూ యంత్రాంగం పూర్తిగా విఫలమైందన్నారు. హమాలీల కొరత, రవాణా (లారీల) కొరత ఉందనే కుంటిసాకులు చెప్తూ నెల రోజులుగా కొనుగోళ్లను నానబెట్టడం దారుణమని ధ్వజమెత్తారు.
మిల్లర్లతో కుమ్మక్కై నిలువు దోపిడీ
కొనుగోలు కేంద్రాలకు వచ్చిన ధాన్యానికి తరుగు పేరుతో క్వింటాల్‌కు ఏకంగా 8 కిలోల వరకు కోత విధిస్తూ రైతులను అరిగోస పెడుతున్నారని రామారావు ఆగ్రహం వ్యక్తం చేశారు. కొందరు అధికారులు, ఐకేపీ నిర్వాహకులు మిల్లు యజమానులతో (మిల్లర్లతో) కుమ్మక్కై రైతులను నిలువు దోపిడీకి గురిచేస్తున్నారని ఆరోపించారు. కష్టపడి పండించిన పంటను దళారుల పాలు చేస్తుంటే ప్రభుత్వం చూస్తూ ఊరుకుంటోందని, ఈ దోపిడీకి ప్రభుత్వం త్వరలోనే భారీ మూల్యం చెల్లించుకోక తప్పదని హెచ్చరించారు.
మే 30న కరీంనగర్‌లో సమరభేరి
రైతాంగ సమస్యల పట్ల రాష్ట్ర ప్రభుత్వం అవలంబిస్తున్న నిర్లక్ష్య వైఖరిని ఎండగడుతూ, అన్నదాతల న్యాయమైన డిమాండ్ల సాధన కోసం మే 30వ తేదీన పోరాటాల గడ్డ కరీంనగర్ వేదికగా బృహత్ సభను నిర్వహించనున్నట్లు పోలాడి రామారావు వెల్లడించారు. రాష్ట్రస్థాయిలో లక్షలాది మంది రైతులు పాల్గొనే ఈ ‘రైతుల మహాగర్జన సమరభేరి’ సభ ద్వారా ప్రభుత్వం మెడలు వంచి, రైతులకు న్యాయం జరిగేలా చూస్తామని స్పష్టం చేశారు. ఈ సభను విజయవంతం చేయాలని ఆయన పిలుపునిచ్చారు.
ఈ క్షేత్రస్థాయి పర్యటన మరియు సమావేశంలో రైతు ప్రజా సంఘాల ముఖ్య నాయకులు మూల పుల్లారెడ్డి, కిషన్ రెడ్డి, సమ్మయ్య, రవీందర్ రావు, దేవేందర్ రెడ్డి, మహిపాల్, సత్తి రెడ్డి, తిరుపతి రెడ్డి, మల్లేశం, రాజిరెడ్డి తదితరులు పాల్గొని రైతులకు మద్దతుగా నిలిచారు.