బాహు బలంన్యూస్ కరీంనగర్, జూలై 05 :
ఎల్‌నినో ప్రభావంతో ఏర్పడిన తీవ్ర వర్షాభావ పరిస్థితుల వల్ల సాగునీరు అందక రైతాంగం తీవ్ర ఆందోళన చెందుతోందని, తక్షణమే కాళేశ్వరం ప్రాజెక్టు పరిధిలోని కన్నెపల్లి పంప్‌హౌస్ ద్వారా గోదావరి జలాలను విడుదల చేసి రైతులను ఆదుకోవాలని రైతు ప్రజా సంఘాల జేఏసీ జాతీయ అధ్యక్షుడు పోలాడి రామారావు ప్రభుత్వాన్ని డిమాండ్ చేశారు. ఆదివారం కరీంనగర్‌లో నిర్వహించిన రైతు ప్రజా సంఘాల రాష్ట్ర, ఉమ్మడి జిల్లాల నాయకుల సమావేశంలో ఆయన మాట్లాడారు. నీటి కొరత కారణంగా నేటికీ వరి నాట్లు వేయలేక అన్నదాతలు ఆవేదన చెందుతున్నారని పేర్కొన్నారు.
ఆ వృథా నీటిని ఎత్తిపోయండి!
ప్రస్తుతం కన్నెపల్లి పంప్‌హౌస్ వద్ద గోదావరి నది 93 మీటర్ల పైచిలుకు ఎత్తులో ప్రవహిస్తోందని పోలాడి రామారావు తెలిపారు. గత రెండు రోజులుగా దాదాపు 10 టీఎంసీల మేర గోదావరి నీరు అందుబాటులో ఉందన్నారు. మేడిగడ్డ బ్యారేజ్ గేట్లతో ఎలాంటి సంబంధం లేకుండా, కన్నెపల్లి పంప్‌హౌస్‌లోని రెండు పంపులను తక్షణమే ఆన్ చేసి నీటిని ఎత్తిపోయాలని కోరారు. లభ్యతగా ఉన్న నీటిని సద్వినియోగం చేసుకొని ఆయకట్టు రైతులకు తక్షణమే సాగునీరు అందించాలన్నారు.
ఏడు జిల్లాల రిజర్వాయర్లను నింపాలి..
కన్నెపల్లి ద్వారా ఎత్తిపోసే నీటితో మిడ్ మానేరు, లోయర్ మానేరు, మల్లన్న సాగర్, రంగనాయక సాగర్, బస్వాపూర్ రిజర్వాయర్లతో పాటు మార్గమధ్యలో ఉన్న చెరువులన్నింటినీ నింపాలని రామారావు సూచించారు. దీనివల్ల ఉమ్మడి కరీంనగర్, ఉమ్మడి వరంగల్ జిల్లాలతో పాటు సూర్యాపేట తదితర ఏడు జిల్లాల రైతులకు సాగునీరు అందించే అవకాశం ఉంటుందన్నారు. ఇప్పటికే ఆయా ప్రాజెక్టుల రిజర్వాయర్లలో కనీస స్థాయిలో కూడా నీటి నిల్వలు లేకపోవడంతో, తాగునీరు అందించడం కూడా దుర్భరంగా మారిందని ఆవేదన వ్యక్తం చేశారు.
ప్రభుత్వ నిర్లక్ష్యంతోనే నష్టం..
గోదావరి ప్రవాహం తగ్గి రోజుకు 1 టీఎంసీ నీరు ఉన్నా కూడా అన్నారం, సుందిల్ల వద్ద తాత్కాలికంగా అడ్డుకట్టలు వేసి నీటిని వాడుకునే ప్రత్యామ్నాయ మార్గాలను అన్వేషించాలని రామారావు కోరారు. ప్రభుత్వం ముందే అప్రమత్తమై ఉంటే ఇప్పటికే వృథాగా సముద్రంలో కలిసిపోయిన దాదాపు 20 టీఎంసీల నీటిని కాపాడుకునే వాళ్లమని, ఈ నష్టానికి ప్రభుత్వ నిర్లక్ష్యమే కారణమని ఆయన విమర్శించారు.
ఈ సమావేశంలో రైతు ప్రజా సంఘాల రాష్ట్ర, జిల్లాల నాయకులు ల్యాగల వీరారెడ్డి, బోయినపల్లి శ్రీనివాస్ రావు, కొత్తకొండ రవీందర్ రావు, దండ వెంకటేశ్వర్ రావు, అండెం రమణా రెడ్డి, తోపు శ్రీనివాస్, తీగల లక్ష్మణ్, వెన్నమనేని విక్రమనరసింహా రావు తదితరులు పాల్గొన్నారు
