బాహు బలంన్యూస్ హుజురాబాద్, ఫిబ్రవరి 4:
హుజురాబాద్ మున్సిపాలిటీలో ఎన్నికల వేడి పతాక స్థాయికి చేరింది. పట్టణంలోని రెండో వార్డు (గణేష్ నగర్) భారతీయ జనతా పార్టీ కౌన్సిలర్ అభ్యర్థిగా బరిలో ఉన్న దున్నపోతుల ఎల్లమ్మ తన ప్రచార పర్వంలో దూసుకుపోతున్నారు. తన భర్త దున్నపోతుల వీరయ్య, కుమారుడు అశోక్ తో కలిసి ఆమె వార్డులోని ప్రతి గల్లీని చుట్టేస్తూ, కమలం పువ్వు గుర్తుకు ఓటు వేయాలని అభ్యర్థిస్తున్నారు. మంగళవారం వార్డులో నిర్వహించిన ఇంటింటి ప్రచారానికి స్థానిక ప్రజల నుండి అపూర్వ స్పందన లభించింది.
ప్రజా సమస్యలే అజెండాగా ముందడుగు:
గణేష్ నగర్ వాసిగా స్థానిక సమస్యలపై పూర్తి అవగాహన ఉన్న ఎల్లమ్మకు మహిళలు హారతులు పట్టి, తిలకం దిద్ది ఘనస్వాగతం పలుకుతున్నారు. ఈ సందర్భంగా ఆమె మాట్లాడుతూ.. రెండో వార్డును పట్టణంలోనే ఆదర్శవంతమైన వార్డుగా తీర్చిదిద్దడమే తన లక్ష్యమని పేర్కొన్నారు. ముఖ్యంగా డ్రైనేజీ సమస్యలు, సి.సి. రోడ్ల నిర్మాణం మరియు స్వచ్ఛమైన తాగునీరు అందించడానికి ప్రథమ ప్రాధాన్యత ఇస్తానని హామీ ఇచ్చారు. అవినీతి రహిత పాలన కేవలం బిజెపితోనే సాధ్యమని, ప్రజలంతా మార్పును కోరుకుంటున్నారని ఆమె ధీమా వ్యక్తం చేశారు.
విజయం ఖాయమంటున్న బీజేపీ శ్రేణులు:
అభ్యర్థి తరపున ప్రచారాన్ని పర్యవేక్షిస్తున్న దున్నపోతుల వీరయ్య మాట్లాడుతూ.. ప్రధాని మోదీ నాయకత్వంలోని కేంద్ర ప్రభుత్వ పథకాలు, అభివృద్ధిని చూసి ప్రజలు బీజేపీ వైపు మొగ్గు చూపుతున్నారని తెలిపారు. సామాన్య కార్యకర్త కుటుంబానికి పార్టీ అభ్యర్థిత్వాన్ని కేటాయించడం పట్ల వార్డు వాసులు హర్షం వ్యక్తం చేస్తున్నారని, ఈ ఎన్నికల్లో రెండో వార్డులో కాషాయ జెండా ఎగురవేయడం ఖాయమని స్పష్టం చేశారు. ఈ ప్రచార కార్యక్రమంలో పార్టీ ముఖ్య నాయకులు, కార్యకర్తలు మరియు పెద్ద ఎత్తున వార్డు ప్రజలు పాల్గొని "జై బిజెపి.. జై జై బిజెపి" అంటూ నినాదాలతో హోరెత్తించారు.