బాహు బలంన్యూస్ హుజూరాబాద్,(అక్టోబరు 15):
హుజూరాబాద్ పట్టణంలో మిషన్ భగీరథ తాగునీరు పెద్దఎత్తున వృథాగా పోతూ మురుగు కాల్వల పాలవుతోందని బీసీ జేఏసీ నాయకులు ఆందోళన వ్యక్తం చేశారు. గురువారం పట్టణంలోని విజయ డయాగ్నోస్టిక్ కేంద్రం, కేరళ స్కూల్ తదితర ప్రాంతాల్లో రోడ్లపై ప్రవహిస్తున్న తాగునీటిని నాయకులు పరిశీలించారు.
ఈ సందర్భంగా బీసీ జేఏసీ గౌరవ అధ్యక్షుడు చందుపట్ల జనార్ధన్, అధ్యక్షుడు సందేల వెంకన్న మాట్లాడుతూ.. వర్షాభావ పరిస్థితుల వల్ల భవిష్యత్తులో నీటి ఎద్దడి పొంచి ఉన్నా అధికారులు నిర్లక్ష్యంగా వ్యవహరించడం శోచనీయమన్నారు. కళ్లముందే అమూల్యమైన తాగునీరు వృథాగా పోతున్నా మున్సిపల్, మిషన్ భగీరథ యంత్రాంగం నిమ్మకు నీరెత్తినట్లు వ్యవహరిస్తోందని మండిపడ్డారు. పట్టణంలో కొన్ని ప్రాంతాల్లో అవసరానికి మించి నీరు వదిలి వృథా చేస్తుంటే, మరికొన్ని ప్రాంతాల్లో ప్రజలు చుక్క నీటికి అల్లాడుతున్నారని ఆవేదన వ్యక్తం చేశారు.
కౌన్సిలర్లు తమ వార్డుల్లో పర్యటించి పైపుల లీకేజీలకు వెంటనే మరమ్మతులు చేయించాలని కోరారు. ఇళ్ల నల్లాలకు క్యాప్‌లు అమర్చుకునేలా ప్రజలకు అవగాహన కల్పించడంతో పాటు సిబ్బందితో నిరంతర పర్యవేక్షణ చేపట్టాలని డిమాండ్ చేశారు. కార్యక్రమంలో జేఏసీ నాయకులు ఇప్పకాయల సాగర్, మామునూరి ప్రవీణ్ కుమార్, కొలిపాక క్రాంతి కుమార్ తదితరులు పాల్గొన్నారు.
