బాహు బలంన్యూస్ హుజురాబాద్,మే 16:
మండల పరిధిలోని రాంపూర్ గ్రామ పంచాయతీ నూతన కార్యదర్శిగా బాధ్యతలు స్వీకరించిన మహేందర్ రెడ్డిని శనివారం గ్రామ ప్రజాప్రతినిధులు ఘనంగా సన్మానించారు. ఇటీవల జరిగిన బదిలీల్లో భాగంగా మండలంలోని శాలపల్లి గ్రామ పంచాయతీ నుండి రాంపూర్ గ్రామానికి ఆయన బదిలీపై వచ్చారు. ఈ సందర్భంగా ఆయన శనివారం అధికారికంగా పదవీ బాధ్యతలు చేపట్టారు.

శాలపల్లి నుండి బదిలీపై రాక..

గతంలో శాలపల్లి గ్రామ పంచాయతీ కార్యదర్శిగా విశేష సేవలందించిన మహేందర్ రెడ్డి, ప్రభుత్వ ఆదేశాల ననుసరించి రాంపూర్ గ్రామ పంచాయతీకి బదిలీ అయ్యారు. ఈ రోజు రాంపూర్ గ్రామ పంచాయతీ కార్యాలయానికి చేరుకున్న ఆయనకు సర్పంచ్, ఉపసర్పంచ్, వార్డు సభ్యులు మరియు గ్రామస్తులు సాదరంగా స్వాగతం పలికారు. అనంతరం ఆయన బాధ్యతలను స్వీకరించారు.

పాలకమండలి ఆధ్వర్యంలో ఘన సన్మానం.

నూతన కార్యదర్శిగా బాధ్యతలు చేపట్టిన మహేందర్ రెడ్డిని గ్రామ సర్పంచ్ ముషం సంగీత, ఉప సర్పంచ్‌ల ఫోరం మండల అధ్యక్షులు వన్నాల శివాజీలు శాలువాతో ఘనంగా సత్కరించి, పుష్పగుచ్ఛం అందించి శుభాకాంక్షలు తెలియజేశారు. ఈ సందర్భంగా వారు మాట్లాడుతూ.. నూతన కార్యదర్శి ఆధ్వర్యంలో రాంపూర్ గ్రామం అన్ని రంగాల్లో మరింత అభివృద్ధి చెందాలని, ప్రభుత్వ సంక్షేమ పథకాలు ప్రజలందరికీ సకాలంలో అందేలా చూడాలని కోరారు. గ్రామాభివృద్ధికి పాలకమండలి పూర్తి స్థాయిలో సహకరిస్తుందని వారు ఈ సందర్భంగా హామీ ఇచ్చారు.

ప్రజాప్రతినిధుల ఆకాంక్ష..

ఈ సన్మాన కార్యక్రమంలో గ్రామ పంచాయతీ వార్డు సభ్యులు రమేష్, రాజ్ కుమార్, మంగ, మానస,పద్మ, జ్యోతి, బిక్షపతి, రాజు, శ్రీలత, శారద, శ్యామ్ తదితరులు పాల్గొని నూతన కార్యదర్శికి శుభాకాంక్షలు తెలిపారు. గ్రామంలోని సమస్యల పరిష్కారానికి, పారిశుధ్య నిర్వహణకు మరియు పచ్చదనం పెంపొందించేందుకు నూతన కార్యదర్శి పాలకమండలితో సమన్వయం చేసుకుంటూ ముందుకు సాగాలని వారు ఆకాంక్షించారు. ఈ కార్యక్రమంలో గ్రామ పంచాయతీ సిబ్బంది, స్థానిక నాయకులు మరియు గ్రామస్తులు పాల్గొన్నారు.