బాహు బలంన్యూస్ హుజూరాబాద్, జనవరి 27:
హుజురాబాద్ మండలం కాట్రపల్లి గ్రామంలో మంగళవారం పశుసంవర్ధక శాఖ ఆధ్వర్యంలో ఉచిత పశువైద్య ఆరోగ్య మరియు పునరుత్పత్తి శిబిరాన్ని ఘనంగా నిర్వహించారు. తెలంగాణ పశుగణాభివృద్ధి వ్యవస్థలో భాగంగా ఏర్పాటు చేసిన ఈ శిబిరాన్ని గ్రామ సర్పంచ్ శ్రీమతి పెరుమాండ్ల హైమా బిక్షపతి జ్యోతి ప్రజ్వలన చేసి ప్రారంభించారు. ఈ సందర్భంగా ఆమె మాట్లాడుతూ.. గ్రామంలోని పాడి రైతులు తమ పశువుల ఆరోగ్యం పట్ల అప్రమత్తంగా ఉండాలని, ప్రభుత్వం అందిస్తున్న ఇలాంటి ఉచిత వైద్య సదుపాయాలను సద్వినియోగం చేసుకొని గ్రామంలో పాల ఉత్పత్తిని పెంపొందించాలని కోరారు. అనంతరం సింగపూర్ పశువైద్యాధికారి డాక్టర్ పి. రవీందర్ రెడ్డి రైతులను ఉద్దేశించి మాట్లాడుతూ.. పశువులలో వచ్చే గర్భకోశ సమస్యల వల్ల పునరుత్పత్తి సామర్థ్యం తగ్గి రైతులు నష్టపోయే ప్రమాదం ఉందని, శాస్త్రీయ పద్ధతులలో పశువులను పోషించడం ద్వారా పాడి పరిశ్రమను లాభసాటిగా మార్చుకోవచ్చని సూచించారు.
ఈ శిబిరంలో సుమారు 125 పాడి పశువులకు గర్భకోశ వ్యాధి నిర్ధారణ పరీక్షలు నిర్వహించి, వాటికి అవసరమైన మందులను ఉచితంగా పంపిణీ చేశారు. పునరుత్పత్తి సమస్యలతో బాధపడుతున్న పశువులకు ప్రత్యేక చికిత్సలు అందించారు. ఈ కార్యక్రమంలో చెల్పూర్ పశువైద్యాధికారి డాక్టర్ రాజేష్, జమ్మికుంట పశువైద్యాధికారి రాజ్ కుమార్, గ్రామ ఉపసర్పంచ్ గంగాదారి బిక్షపతి, గోపాల మిత్ర సూపర్వైజర్ రామ్ రెడ్డి, గోపాల మిత్రులు పెరుమాళ్ళ రవీందర్, రమేష్ మరియు గ్రామంలోని అధిక సంఖ్యలో రైతులు తమ పశువులతో హాజరై శిబిరాన్ని విజయవంతం చేశారు.